October 29, 2014 · 

----------- : আজৰা(আজাৰা), ভিআপি(ভি আই পি), মিজ্জা(মিৰ্জা), ছইগাওঁ(ছয়গাওঁ)- - -খালী গাড়ী, খালী গাড়ী : ---------

----খালী গাড়ী, খালী গাড়ী- - -আজৰা(আজাৰা), ভিআপি(ভি আই পি), মিজ্জা(মিৰ্জা), ছইগাওঁ(ছয়গাওঁ)- - - বাইদেউ ক'ত যাব ?
----ৰাণী গেইট ।
----উঠক বাইদেউ ।
----একেবাৰেই খালী চোন ? বেছি দেৰি হ'ব নেকি যাওঁতে ।
----নহয় বাইদেউ । আৰু দুজনমান উঠিলে যাওঁৱেই আৰু ।

"জানে জানা দীৱানা, তেৰা নাম ৰখ দিয়া,
তেৰা নাম ৰখ দিয়া - - -"

বহুদিনৰ পিছত শুনিলোঁ গানটো । এসময়ৰ 'হিট' গান । মনটো ভল লাগি গল । গানটোৱে মিচিকিয়া হাঁহি এটা আনি দিলে নিজৰ অজানিতে । এসময়ৰ গান যে !

আৰু কেইজনমান যাত্ৰী উঠিল মেজিকখনত । মোৰ সন্মুখত বহা মানুহজনীয়ে চকুৱে চকুৱে পৰাত অকণমান হাঁহিলে । ময়ো হাঁহিলো প্ৰত্যুত্তৰত । অচিনাকিজনৰ লগত হোৱা ক্ষন্তেকীয়া হাঁহিৰ বিনিময়েওচোন মনলৈ কিবা এক ভাল লগা ভাব আনি দিয়ে । ভাল লাগি গল । আবেলি সময় । সকলোৰে ঘৰমুৱা অভিযান । শৰীৰত ক্লান্তিৰ চাপ বিৰাজমান যদিও "ঘৰ গৈ পাম আৰু" এই ভাবৰ সন্তুষ্টিও যেন লাগি আছে চকুৱে-মুখে ।

সকলো চিট ভৰিছেই । মাত্ৰ মোৰ সন্মুখৰ চিটটোত চাৰিৰ ঠাইত তিনিজন বহি আছে । এজনী মহিলা গাড়ীত উঠিব খুজিও ৰৈ দিলে । খালী চিটটো ওলোটামুৱাকে আছে । তেখেতৰ হেনো সন্মুখৰ পিনে পিঠি দি বহিলে বমি ভাব আহে । এনেতে মোৰ ওচৰত বহা এজনে সেই চিটটোত বহি মানুহজনীক বহাত সুবিধা কৰি দিলে ।

গাড়ী চলিব ধৰিলে । মোৰ লগত আৰু সন্মুখত বহা মহিলা দুগৰাকীয়ে ইতিমধ্যে নিজৰ মাজত কথা পতা আৰম্ভ কৰি দিছে । দুয়ো অফিচ চুটিৰ পিছত ঘৰমুৱা হৈছে । মোৰ লগত বহা গৰাকীৰ ঘৰ ছয়গাওঁত আৰু আনগৰাকীৰ মিৰ্জাত । মোৰ লগত বহাগৰাকী অফিচৰ কিবা মিটিং থকা বাবে দুদিন নলবাৰীত আছিল । দুয়ো ৰাতিয়ে টোপনি ক্ষতি । মুৰটো সিমান ভাল লাগি নাই হেনো । সেইবাবে বমি হোৱাৰ ভয়ত ওলোটাকে নবহিল । আনগৰাকীৰ তেনে কোনো সমস্যা নাই । তেখেতৰ সৰুজনী জীয়েকৰহে আগতে গাড়ীত উঠিলেই বমি হৈছিল । এতিয়া পিছে ঠিক হৈ গল । তাই এতিয়া অকলে উৰাজাহাজতো যাব পাৰে । গাড়ীত উঠিলে সাধাৰণতে কাৰো লগত কথা বতৰা নাপাতো যদিও আনৰ এই টুকুৰা-টকুৰ খবৰ আৰু কথা-বতৰা শুনি ভাল লাগে ।

"বাদলমে চুপ ৰহা হে চান্দ কিউ - - -"

গাড়ীৰ 'মিউজিক চিষ্টেমৰ' পৰা ভাহি অহা গানটো এসময়ত বৰ ভাল লাগিছিল । যিমান শুনিলেও তেতিয়া হেঁপাহ নপলাইছিল । কিমান দিনৰ পিছত শুনিলো বাৰু গানটো ? গানটোৱে মনটোক ক্ষন্তেকৰ বাবে স্মৃতি হৈ যোৱা দিনবোৰলৈ মনত পেলেই দিলে । চকু দুটা গাড়ীৰ খিৰিকিৰে আকাশলৈ গল । চাগে মেঘৰ আঁৰত চন্দ্ৰটোক কৰবাত দেখোঁ বুলিয়েই । চন্দ্ৰ নাই । শৰতৰ ধুনীয়া আবেলিৰ সুন্দৰ আকাশ এখনহে আছে চকুৰ আগত । শৰতৰ আকাশ এনেয়েও অনন্য । পশ্চিমত ডুবিব লোৱা ৰঙা বেলিটিয়ে পুব আকাশৰ শুকুলা মেঘত অপূৰ্ব ৰঙৰ আভা চৰাইছে । সময়ৰ লগত জীৱনে আৰু ঋতুৰ লগত আকাশে ৰং-ৰূপ সকলো সলায় । কোনো ৰূপেই যে কাৰো লগত তুলনা নহয় ।

বিশ্ববিদ্যালয় গেইট পালোঁ । এজন যাত্ৰী নামিল আৰু এজনী ছোৱালী উঠিল । জীনচ-টপ পৰিহিতা ধুনীয়া গঢ়ৰ মৰমলগা ছোৱালী এজনী । দেখিলেই গম পায় বিশ্ববিদ্যালয়ৰ ছাত্ৰী বুলি । পুৱা সাঁজি-কাচি ওলাই অহাৰ সাক্ষী বহন কৰিছে প্ৰায় মোচ খাই যোৱা দুচকুৰ ডাঠ কাজল আৰু ৰং পাতল হৈ যোৱা ওঠৰ লিপষ্টিকে । তথাপিও ভাল লাগিছে তাইক । কি আছে চকুযুৰিত ?! ভবিষ্যতৰ সপোন নে এইমাত্ৰ 'বাই' বুলি কৈ গাড়ীত উঠাই দি যোৱাজনক কাইলৈ পুনৰ লগ পোৱাৰ হেঁপাহ ! কিয় বা মনটোৱে কৈ উঠিল --"পূৰণ হওক তাইৰ দুচকুৰ সপোন, হেঁপাহ ।" গাড়ীত ভাড়া দি তাই "কৈলাচ নগৰ" বুলি কলে । আজিকালিৰ উচ্চাৰণ 'কৈলাশ' গৈ 'কৈলাচ' হ,ল । মনতে অলপ হাঁহিলো । মোৰ সন্মুখত বহা মানুহগৰাকীয়ে তাইক ভাড়াঘৰত থাকে নেকি বুলি সুধিলে । তাই 'প্ৰাইভেট হোষ্টেলত' থকাৰ কথা কলে । পাঁচমিনিটমানৰ পিছতেই তাই তাইৰ 'ষ্টপেজ' পালে । নমাৰ সময়ত তাই মিচিকিয়াই মানুহগৰাকীক " আহোঁ" বুলি মাত লগাই গল । কিয় বাৰু মানুহবোৰে আজিকালিৰ সকলো ল'ৰা-ছোৱালীক শিষ্টাচাৰ-ব্যবহাৰ একো নাজানে বুলি কয় ? আমি চাওঁতাবোৰে চাগে অকল বেয়াটোহে চাব বিচাৰোঁ ,সেয়ে ভালবোৰ চকুতেই নপৰে ।

মোৰো ষ্টপেজ' আহি পাবৰ হৈছেই আৰু । মনে মনে সাজু হৈছো নামিবৰ বাবে । বহুদিনৰ পিছত অকলে ওলাই গৈছিলো । ঘৰটো আহি নাপাব যেনেই লাগি গৈছে । মোলৈ বাট চাই ৰৈ আছে চাগে ল'ৰাদুটায়, মানুহজনে । গাড়ীৰ পৰা নামি চকলেট দুটা লব লাগিব ইহঁত দুটালে । ভাল লাগি যায় যেতিয়া দুয়ো পিনৰ পৰা দুটায় আহি হুলস্থুল লগায়--" মা মোৰ পৰা আগতে এটা 'বাইট' খোৱা না । মোৰ পৰা আগতে খোৱা ।" চাগে জীৱন এয়ায় আৰু সুখো । মানহজনে ৰাৰু চাহকাপ বনাই খালেনে ? গাড়ীত এতিয়া বাজি আছে---

"তু মিলে, দিল খিলে, ওউৰ জিনে কো ক্যেয়া চাহিয়ে - - -"

----বাইদেউ ৰাণী গেইট, ৰাণী গেইট ।